Молитва к благоверной

(преподобной) княгине Февронии,

в иночестве Евфросинии

 

  О, велицыи угодницы Божии и предивнии чудотворцы благовернии княже Петре и княгине Февроние, града Мурома предстатели и хранители и о всех нас усерднин ко Господу молитвенницы! К вам прибегаем и вам молимся со усердием крепким: принесите за нас, грешных, святыя молитвы ваша ко Господу Богу, и испросите нам у благости Его вся благопотребныя душам и телесем нашим: веру праву, надежду благу, любовь нелицемерну, благочестие непоколебимое, в добрых делах преуспеяние, мира умирение, земли плодоносие, воздуха благорастворение, душам и телесем здравие и вечное спасение. Исходатайствуйте у Царя Небеснаго Церкви Святей и всей стране Российстей мир, тишину и благоустроение и всем нам житие благополучное и добрую христианскую кончину. Оградите отечество ваше, град Муром и все грады Российския от всякаго зла и вся правоверные люди, к вам приходящия и мощем вашим преклоняющияся, осените благодатным действом благоприятных молитв ваших, и вся прошения их во благо исполните. Ей, чудотворцы святии! Не презрите молитв ваших, со умилением вам возносимых, но будите о нас приснии предстатели ко Господу и сподобите нас помощию вашею святою спасение вечное получити и Царствие Небесное унаследовати, да славословим неизреченное человеколюбие Отца и Сына и Святаго Духа, в Троице покланяемаго Бога во веки веков. Аминь.

назад

 

Православное Ступино начальная
Hosted by uCoz